”ပြက္ခဒိန်တွေကို ဆွဲစုတ်ပစ်ချင်နေတဲ့စိတ်”
ဟော့ဒီမှာ….
မျှော်လင့်ချက်တွေ အခါခါပေါက်ဖူးတဲ့
ကျနော့်ရင်ဘတ်ကြီးလည်း ဖုန်းဆိုးမြေလိုခြောက်
ဘဝအပြင်းစား တခွက်ကို
ရေမရောပဲ မျှဉ်းသောက်နေရပေါ့…အမေ….

ဒါပေမယ့်
နတ်မလိုက်နိူင်တဲ့ လူ့အလိုတော်ကို
စိတ်ထဲမှာ မျိုးကျဲ
တဖက်လေးငါးရာသော
နတ်သမီးလေးတွေနဲ့လည်း
တကြိမ်တခါမှ မတွဲချင်ခဲ့မိတာ
ကျနော့်ကိုယ်ကျနော် သိပ်သေချာတယ်….အမေ…

ဘုရားပေးတဲ့ အားဆေးတစက်ကို
လျှာနဲ့ တို့ထိလျက်မြိုနိူင်ဖို့တွက်
ဘုရင့်နောင်လို ဖောင်ကိုဖျက်
”ပရ”ပင်လယ်နက်ထဲ
လက်ပစ်ကူးခဲ့ဖူးတဲ့
နာရီနဲ့ နေ့ရက်တွေက
ဟောဒီလူရဲ့ ကမ္ဘာမြေမှာ
”တချက်ချက်”မြည်လို့ကြွေရင်း…..

ဘိုးဘိုးအောင် ဆောင်ကြဉ်းမပေးနိူင်တဲ့ကံကို
စိတ်တို့ရဲ့ပုခုံးပေါ်မှာ ထမ်းပိုး
အနာဂတ်ကို
ထီတစောင်လို စမ်းထိုးကြည့်ခဲ့မိတာလည်း
အကြိမ်ကြိမ် အခါခါ……..

ကံကြမ္မာက ဂျောက်ချလို့
ပျောက်ရှခဲ့ရတဲ့ လမ်းမကို
လွမ်းဆွတ်ခြင်း အလိုတော်တွေနဲ့
လမ်းပြမြေပုံတချပ် ပြန်ဆွဲ
မကြာမကြာ အမေ့အိမ်ထဲ ပြန်ခွေလှဲတယ်…

ထပ်တူထပ်မျှ
စိတ်နဲ့ကိုယ် ပြိုင်တူအိုလာရတဲ့ ဘဝမှာ
ဒါလီရဲ့ နာရီတွေကို အရည်ကြိုချပြီး
အတိတ်မြင်းရိုင်းကို ပြန်ဒုန်းမစိုင်းလိုတော့ပါဘူး…အမေ…..

ပြင်ပဇီဝတွေက
ခန္ဒာဝန်ကို စိန်ခေါ်ထိုးခြေမွှသလောက်
ပြန်မရောက်နိူင်သေးတဲ့ နေရာမှာ
စံပင်ပင်တွေမပေါက်တာ အတော်ကြာပြီလို့
အမေပေးတဲ့နားတွေနဲ့ ကြားသိနေရတဲ့အခါ
ရှိသမျှစိတ်တွေ အကုန်နာတယ်…အမေ….

ဒီတခါ အိမ်ပြန်လာနိူင်ဖို့အတွက်
ရှိသမျှအားတွေနဲ့ လက်တွေဆန့်ထုတ်
ပြက္ခဒိန်တွေကို ဆွဲစုတ်ပစ်လိုက်ချင်တယ်…အမေ…။